ايه سر الزيارة المهمة اللي بيقوم بيها الرئيس السيسي للكويت وقطر.. وليه جاية في التوقيت دا بالذات وايه الملفات المهمة جدا اللي هيناقشها الرئيس مع قادة الدول الخليجية.
الرئيس السيسي بدأ جولة مهمة جدا لمنطقة الخليج العربي والحقيقة الزيارة جاية في وقت الرئيس السيسي بيبذل جهود جبارة عشان يحل أزمات المنطقة وعشان مصر تعبر الأزمات اللي حصلت بسببها وشفنا إزاي الجدول الرئاسي للسيسي كان مشغول ازاي في الأيام الأخيرة والقاهرة بقت محطة مهمة لزعماء العالم وشفنا زياره ماكرون الناجحة لمصر وبعدها على طول زيارة الرئيس الاندونيسي وكلها كانت ليها نتايج اقتصادية سعيدة ومهمة جدا.
طيب ليه الريس السيسي رايح قطر والكويت ؟
زيارات القادة العرب لمصر أو العكس مش بتحتاج سبب لأنها علاقات طبيعية ومصير مشترك باعتبار العرب أمة واحدة واي زيارة ييقوم بيها الرئيس السيسي لاي عاصمة عربية أو أجنبية بتخدم المصالح المباشرة لمصر والمصالح القومية العربية بشكل عام.. وزيارة الرئيس للدوحة والكويت أهدافها كتير جدا أولها تبادل وجهات النظر في الأحداث الساخنة بالمنطقة وتاني حاجة تعزيز التعاون في كل المجالات وخاصة المجالات الاقتصادية.
وبخصوص المجالات الاقتصادية فحسب الخبراء الزيارة هتكون مهمة جدا لانها هتشهد نقلة في الاستثمارات الخليجية في مصر وزيادة التعاون الاقتصادي وهيكون فيه كلام مهم جدا عن الديون الخليجية على مصر ومبادلتها باستثمارات ومشروعات ودا اللي قلناه في بانكير من فترة قريبة جدا وقلنا إن مصر بتعمل مفاوضات من الكويت على مبادلة 4 مليار دولار ودائع في البنك المركزي المصري لاستثمارات زي ما حصل قبل كده مع الامارات العربيه ودخل جزء كبير من الديون في صفقة رأس الحكمة ..
كمان الزيارة الخليجية هتفتح ابواب جديده في الاستثمارات الخليجية في مصر وهتنقل العلاقات لمستوي مختلف وخاصة مع الأزمات الاقتصادية اللي بيعشها العالم كله اليومين دول بسبب قرارات ترامب واضطراب الأسواق ودا خلق خريطة جديدة للتحالفات الاقتصادية العالمية وبالبلدي كده كله بيدور على مصلحته والعرب مطلوب منهم التعاون دلوقتي اكتر من اي وقت فات عشان يحافظوا على موادرهم وثرواتهم واستثمارتهم ومصر بديل ممتاز للأسواق الغربية بالنسبة لرؤوس الأموال الخليجية يعني العرب أولي بفلوسهم ومصر من افضل الأسواق العالمية دلوقتي في الاستثمار ودا اللي بتقوله المؤسسات المالية الدولية.
وحسب الأرقام الكويت أعلنت عن زيادة استثماراتها في مصر بحوالي 20% خلال 2025 لتصل إلى 5.3 مليار دولار في اكتر من قطاع خاصة الصناعات التكنولوجية والاتصالات وفي أدارة المطارات والمشاركة بقوة في برنامج الطروحات الحكومية وإعادة تأهيل الشركات.
في نفس الوقت هنسمع عن صفقات مهمة جدا لشركات قطرية في مصر في قطاعات الموانئ والمحطات المتخصصة وتطوير محطات الحاويات الحالية بالموانئ المصرية عن طريق ضخ استثمارات مباشرة لتطوير ورفع كفاءة البنية الفوقية ومعدات التشغيل وتطبيق أحدث نظم التكنولوجيا فى الإدارة والتشغيل.. كمان قطر مهتمة جدا بالاستثمار في قطاعات النقل والصناعة والسياحة والضيافة وهتكون فيه انطلاقة قوية الفترة الجاية في الاستثمارات الخليجية في مصر وكل دا هيكون ليه تأثير مباشر على الأسواق في مصر وسعر الدولار.
0 تعليق